طريقه إشعال النار بدون نفخ ولا دخان طريقه مبتكره !!!!

[محمد الحماد]

طريقة إشعال النار بدون نفخ ولا دخان طريقة مبتكرة !!!!



السلام عليكم ورحمة الله وبركاته

طريقة حلوة بسيطة لإشعال النار

بعد ما تنتهون من سهرتكم على جال الضوء بيبقى الرماد

يجمع في علبة زجاج أو أي علبة بعد ما تمتلئ العلبة با الرماد

تصب عليه قاز (كروسين) وتخلطه مع القاز لأن القاز أفضل من الديزل ما يدخن وأطول عمر في الاشتعال

بعد ما تخلطه تغطيه لبكره

وإذا جيت تبي تتشب النار تحط ملعقة وحدة بس وتكبها تحت الحطب

وتولع فيها شرط يجمر الحطب والولعة عادها شابة أفضل من الولعة البيضاء ألي في السوق


منقول عبر الإيميل

أبو سفيان

[المسافر المحافظ]

سمعت عن هذه الفكرة ولأسف لم اجربها ويبدو انها ممتازة


وثناء تصفحي في الإنترنت ذكر بعض الأخوة بعض الطرق التقليدية

منها وهي ليست لي وانا انقلها لكم للفائدة

وهذا نصها

طبعا الطريقه الإعتياديه معروفه إلي هي جب الحطب وحط تحته مقباس ( منديل أو أي شيء يشب بسرعه ) ثم ولع فيها وقضينا
لكن إذا كان الحطب رطب ففيه أكثر من طريقه :
الأولى إن تجيب قوطي نيدو وتصب فيه شوي بنزين ثم تدفنه وتخلي طرفه طالع ثم تصف حطبك الصغار ثم الكبار .. وتخلي منفذ يدخل معه الهواء ثم تسمي بالله وتنطل عود كبريت في البنزين وتشب ماهنا أزين منها وتبي تطول ماطفت

وفيه طريقه مهيب شينه إلي هي
تجيب موقد يدوي إلي هو تسنه مسدس .. أو بمعنى أصح زي مسدس الماء ينشبك على إسطوانه الغاز ..
ترى يستخدمونه حقين الذهب إذا بغو يذوبونه
المهم تجيب هذا وتسلطه على الحطب دقيقتين إلين يعلق وترتاح

الثالثه ..
تجيب لك ماصورة صغيره بحيث إنها تدخل في راس لي الغاز ثم تضوق راس الماصوره إلي بتستخدمه وتفتح الإسطوانه وتشب وتسلطه على الحطب إلين تعلق الضو


وفيه طريقه إذا هبت هوا وإلا صار حطبك رطب شوي .. إلي هي تجيب قوطي نيدو وتشقه مع الطرفين يعني يصير مفتوح مع الطرفين ثم تحطه على الضوء في الوسط ..يدلي يطلع الدخان مع فوق ويدخل الهواء مع تحت وتقوى النار .. لكن عيب هالطريقة إنها تستهلك الحطب
وتقدر تخلي القوطي أفقي أذا صارت تمطر عشان الما متايدخل من فوق

انتهى

[محمد الحماد]

إضافة جميلة أخي المحافظ
جزاك الله خيرا

[الباخص]

كفو والله مبدعي الرحالة ابوسفيان والمحافظ
لاعدمنا الجميع في هالمعلومات الطيبة والفوائد الرائعة


اخوكم المحب

[Flamingoo]

ياسلام سلم


يعني اللي يبيعون هالولعه البيضاء بيخسرون


مافي حقوق طبع ياشباب


مشكورين على هالمعلومات الطيبه

تحياتي للجميع